حکمران ،بش اور کرزئی کی بجائے عوام کو خوش کریں،چودھری نثار

اسلام آباد (اے پی ایس)قائد حزب اختلاف اور مسلم لیگ ن کے مرکزی رہنما چوہدری نثارعلی خان نے موجودہ حکومت کی خارجہ اور اقتصادی پالیسیوں خاص طور پر صدر آصف علی زرداری کے دورہ امریکہ کو شدید تنقید کا نشانہ بناتے ہوئے کہا کہ ہمیں امریکی صدر بش اور افغان صدر حامد کرزئی کو خوش نہیں کرنا بلکہ پاکستان کے عوام کو خوش کرنا ہے۔اسلام آباد میں پیر کے روزایک نیوز کانفرنس سے خطاب کرتے ہوئے چوہدری نثار نے کہا کہ یہ اچھا ہوتا اگر صدر زرداری ملک میں اپنی خارجہ پالیسی وضع کرتے اور بعد میں امریکہ جا کر اس کااظہار کرتے۔ لیکن چوہدری نثار کے بقول پاکستانی صدر نے اس کے برعکس پاکستان کی خارجہ پالیسی امریکہ میں وضع کی۔ملک کی خارجہ پالیسی کے حوالے سے قائد حزب اختلاف نے کہا کہ پاکستان کو یہ واضح کرنے کی ضرورت ہے کہ ایران پاکستان کی خارجہ پالیسی کی ترجیحات میں کہا ں آتا ہے۔انہوں نے کہا کہ خطے کی موجودہ صورت حال میں ایران انتہائی اہم ملک ہے اور اسے ارادی یا غیر ارادی طور پر نظر انداز کیا جا رہے۔ اس موقع پر انہوں نے کہا کہ موجودہ صورت حال کے تناظر میں پارلیمان کو اعتماد میں لینا انتہائی ضروری ہے۔ چوہدری نثار نے کہا کہ یہ اچھا ہوتا اگر آصف زرداری اپنے وعدے کے مطابق پہلا دورہ چین کا کرتے اور ان کے بقو ل اگر وہ ایسا کرتے تو اس سے چینی حکام اور عوام کے لیے ایک مثبت پیغام جاتا۔ انہوں نے کہا کہ دنیا کے دیگر ممالک کا دورہ کرنے کے بعد یہ کہنا غلط ہو گا کہ پاکستانی صدر کا پہلا باضابطہ دورہ چین کا ہی ہوگا۔پاکستان کی اقتصادی مشکلات کا ذکر کرتے ہوئے چوہدری نثار نے کہا کہ اگرحکومت موجودہ حالات میں بین الاقوامی مالیاتی ادارے IMF سے مددلیتی ہے تو اس کا مطلب پاکستان کو واپس ماضی کی جانب دھکیلناہوگا۔پاکستان میں ہونے والے دہشت گردی کے واقعات کے حوالے سے چوہدری نثار نے کہا کہ حکومت یہ بتائے کہ ان دھماکوں کے پیچھے کو ن سی طاقت ہے انہوں نے کہا کہ طاقت سے دہشت گردی کے ان واقعات کو نہیں روکا جا سکتا۔اس موقع پرقائد حز ب اختلاف چوہدری نثار نے کہا کہ صدر زرداری اپنی اہلیہ اورسابق وزیراعظم بے نظیر بھٹوکے قتل کے حوالے سے کہہ چکے ہیں کہہ ان کے قتل میں طالبان ملوث نہیں ہیں اور وہ اس قتل کے حوالے سے مسلم لیگ ق اور سابق صدر پرویز مشرف کو ذمہ دار ٹھہراتے رہے ہیں ۔جبکہ امریکا کے دورے کے بعد صدر زرداری کہہ رہے ہیں کہ بے نظیر بھٹوکے قتل میں بیت اللہ مسحود ملوث ہیں۔اے پی ایس