ایف سی آر میں متعدد ترامیم کی منظوری دیدی گئی

پشاور۔ وزیراعظم سید یوسف رضا گیلانی کی جانب سے ایف سی آر میں ترامیم کے لئے قائم پارلیمانی کمیٹی کی ذیلی کمیٹی نے ایف سی آر میں متعدد ترامیم کی منظوری دیدی جس کے تحت چالیس ایف سی آر کو آسان بنانے کا فیصلہ کیاگیا ہے ۔اس سلسلے میں ایک اجلاس گورنر فاٹا سیکرٹریٹ میں جسٹس ریٹائرڈ میاں محمد اجمل کی صدارت میں منعقد ہوا جس میں فیصلہ کیاگیا کہ پولیٹکل حکام کے فیصلوں کے خلاف اپیل سیشن جج کے برابر ایپلٹ کورٹ سنے گی یہ بھی فیصلہ کیاگیا کہ ایف سی آر ٹریبونل کا سربراہ پشاورہائیکورٹ کا ریٹائرڈ جج ہو گا ان کے ساتھ آفیسرز بھی ہونگے ۔ٹریبونل کو قبائلی علاقوں میں انسانی حقوق کی خلاف ورزی کے خلاف کاروائی کرنے کا اختیار ہو گا ۔اجلاس میں اے این پی کی نمائندگی کرنے والے پشاورہائیکورٹ بار کے صدر عبد الطیف آفریدی نے ان ترامیم کو ناکافی قرار دیا اور اس سے اختلاف کیا۔انہوں نے کہا کہ اے این پی کا موقف ہے کہ قبائلی علاقوں میں پولیٹکل پارٹیز کو کام کرنے کی اجاز ت دی جائے ،فاٹا کو پاٹا میں تبدیل کیا جائے ،قبائلی علاقوں کو سرحد اسمبلی میں نمائندگی دی جائے ،قبائلی علاقوں کے لئے خصوصی ترقیاتی پیکج منظور کئے جائیں اور فاٹا میں بلدیاتی نظام کو متعارف کرایا جائے ۔انہوں نے کہا کہ اگر اس طرح نہیں کیا جاتا تو یہ اے این پی کی پالیسی کی نفی ہوگی۔کمیٹی نے بتایا کہ اس کے پاس یہ اختیار نہیں بلکہ اس کو یہ اختیار دیاگیا ہے کہ وہ ایف سی آر میں ترامیم تجویز کرے۔