شہری غیر قانونی سکیموں میں پلاٹوں کی خرید وفروخت نہ کریں ۔ سی ڈی اے ترجمان

اسلام آباد ۔ وفاقی دارالحکومت کے خیابان ، مارگلہ اور مارگلہ ہلز کے درمیان حصے میں جاری ہاؤسنگ سکیموں کو سی ڈی اے نے غیر قانونی قرار دیتے ہوئے لوگوں کو خبردار کیا ہے کہ وہ اسلام آباد کے سیکٹر ایریا زون ون میںپلاٹوں کی خرید و فروخت نہ کریں ۔ آج سی ڈی اے کے ڈائریکٹوریٹ آف ہاؤسنگ سوسائٹیز کی جاری کردہ ایک بیان میں عوام الناس کو مطلع کیا گیا ہے کہ اسلام آباد کے سیکٹر ایریا ای ۔ 13 ، ایف ۔ 14 ، ایف ۔13 ، ایف ۔ 12 ، جی ۔ 12 ، ای 15 ، ای 14 ، ڈی ۔ 15 ، ڈی 14 ، ڈی ۔ 13 ، سی ۔ 17 ، سی ۔ 16 ، سی ۔15 ، سی ۔ 14 ، سی ۔13 ، سی ۔ 12 کے علاوہ خیابان مارگلہ اور مارگلہ ہلز کے درمیانی حصے میں غیر قانونی اور بلا اجازت ہاؤسنگ سکیموں کی ڈویلپمنٹ کی سرگرمیاں ہو رہی ہیں ۔ زون ون سیکٹرل ایریا اسلام آباد میں ہاؤسنگ سکیم کی منصوبہ بندی اور ڈویلپمنٹ کا کام غیر قانونی اور بلا اجازت ہے اس لیے لوگوں کو متنبہ کیا جاتا ہے کہ ایسی غیر قانونی ہاؤسنگ سکیموں میں کسی بھی قسم کے پلاٹس کی خرید وفروخت نہ کریں ۔