رواں ہفتے میں وفاقی کابینہ میں توسیع اوربعض وزراء کے قلمدانوں میں ردو بدل کا امکان

اسلام آباد ۔ وفاقی کابینہ میں رواں ہفتے توسیع متوقع ہے ۔ مختلف سطح پر مشاورت مکمل کرلی گئی ہے ۔ بعض وزراء کے قلمدانوں میں ردو بدل کا امکان ہے۔ قومی اسمبلی کی قائمہ کمیٹیوں کے چیئرمینوں کی نامزدگیوں سے متعلق معاملات کو بھی حتمی شکل دے دی گئی ہے ۔ تاہم پارلیمانی سیکریٹریز کے عہدے لینے کے حوالے سے پاکستان مسلم لیگ (ن ) کو آمادہ نہیں کیا جا سکا ہے ۔ ذرائع کے مطابق وفاقی کابینہ میں توسیع اور ردو بدل کے حوالے سے معاملات کو حتمی شکل دے دی گئی ہے ۔ اس ضمن میں اتحادی جماعتوں سے ان کے متوقع وزراء کے قلمدانوں کے بارے میں مشاورت مکمل کرلی گئی ہے ۔ کابینہ میں توسیع کے اس مرحلے پر بیشتر وزراء مملکت ہونگے ۔ پاکستان مسلم لیگ (ن ) کے مستعفی وزراء کی جگہ وفاقی وزراء کے بجائے وزراء مملکت لیے جارہے ہیں ۔ ذرائع نے بتایا ہے کہ قومی اسمبلی کے آئندہ اجلاس سے قبل وفاقی کابینہ میں توسیع ہو گی ۔ بعد ازاں قومی اسمبلی کی قائمہ کمیٹیوں کے چیئر مینوں کے انتخابات کا مرحلہ مکمل کیا جائے گا ۔ اتحادی جماعتوں کے بعض مرکزی رہنماؤں کو قومی اسمبلی کے اراکین ہیں کو بھی قائمہ کمیٹیوں کے چیئر مین بنایا جارہا ہے